Ауғанстанда әйелдерге бір-бірімен сөйлесуге тыйым салынды

Талибан билігі әйелдерге тек ер адамдармен ғана емес, басқа әйелдермен де ашық сөйлесуге тыйым салды деп хабарлайды Orda.kz Bild агенттігіне сілтеме жасап.

Бұл туралы ізгілік министрі Халид Ханафи мәлімдеді. Әйелдер өз дауыстарын басқа ересек әйелдерге естіртпеуі керек. Осыған сәйкес, тәліптер тіпті Құранды басқа әйелдердің қатысуымен дауыстап оқуға тыйым салды.

Тәліптер саясаты адам құқығын таптауды жалғастырып жатыр. Ауғанстанда әйелдерге білім алуға, спортпен айналысуға, ер адамның ертіп жүруінсіз саяхаттауға, сұлулық салондарына немесе әйелдерге арналған баспаналарға баруға тыйым салынған. Қыркүйек айында тәлібтер ізгілік және ар-ождан заңдарын жариялады. Ол 114 беттен тұратын 35 бапты қамтиды. Бұл ереже әйелдерге ән айтуға және көпшілік алдында бірдеңе оқуға тыйым салады. Өйткені олардың дауысы интимдік сипатта деп есептеледі. Сондай-ақ, әйелдерге жабық киім кию және бөтен ер адамдардың көзіне тік қараудан аулақ болу талап етілген.

Бұрын ер адамдарға да тыйым салынған болатын. Оларға джинсы шалбар киюге, сақалдарын жұдырықтан қысқа қылып қыруға және сәнді шаш қиюға рұқсат жоқ.

Еске сала кетсек, Orda.kz тілшісі осындай қатаң заңға бағынған елдегі этникалық қазақтардан сұхбат алған болатын.