Атырауда тапа-тал түсте қыз ұрлаған ер адамға айыппұл салынды  

Атырау қаласының мамандандырылған әкімшілік сотында тапа-тал түсте қыз ұрлаған ер адамға қатысты іс қаралды, деп хабарлайды Orda.kz.  

Сот анықтағандай, ер адам танысын көлігіне отырғызып, жолда екеуінің арасында жанжал туындаған. Қыз сапарын жалғастырудан бас тартып, көліктен түсіп қалған. Алайда, ер адам оны қайтадан көлікке күшпен отырғызуға тырысқан. Қыз түсініктемесінде ер адамның оны үйіне дейін жеткізгенін айтып, оған ешқандай шағымы жоқ екенін көрсеткен.  

«Ер адамның кінәсі оның мойындау көрсетулерімен, әкімшілік құқықбұзушылық туралы хаттамамен, рапортпен және жауап алу хаттамасымен дәлелденді», деп хабарлады сот.  

Оған 20 АЕК көлемінде айыппұл немесе 5-тен 15 тәулікке дейін әкімшілік қамау жазасы қарастырылған.  

«Кінәсін мойындауы және өкінуі жеңілдететін мән-жайлар ретінде танылды, ал ауырлататын мән-жайлар анықталған жоқ»,  деп мәлімдеді сот.  

Сот қаулысы бойынша құқықбұзушыға 78 640 теңге көлемінде әкімшілік айыппұл салынды.