Атырау облысында Жайықтың суы көтерілуде

 Төтенше жағдайлар министрлігінің хабарлауынша, Атырау облысындағы Жайық өзенінде судың көтерілуі жалғасуда.

ҚР Төтенше жағдайлар министрлігінің мәліметінше, соңғы 5 күннен бері өңірге су келуде. «Қазгидромет» РМК-ның 12 мамыр күні сағат 09:00-дегі жағдайына сәйкес Жайық өзеніндегі судың деңгейі:

• Атырау – 538 сантиметр. Тәулігіне + 5 сантиметр. 

• Индербор өңірі – 1033 сантиметр. Тәулігіне +7 сантиметр.

• Махамбет ауданы – 955 сантиметр. Тәулігіне +16 сантиметр.

 «Жайық-Индербор» және «Жайық-Махамбет» өлшеу стансаларында бұл көрсеткіш шекті деңгейден асып түсті. Бұл ретте одан әрі көтерілу күтілуде» делінген ҚР Төтенше жағдайлар министрлігі хабарламасында.

Төтенше жағдайлар министрі Шыңғыс Әрінов Жайық өзенімен Каспий теңізіне қарай төмен түсіп, қорғаныс бөгеттерін көзбен шолып, тексеруден өткізді.

«ҚР Төтенше жағдайлар министрлігінің құтқарушылары Атырау облысындағы Жайық өзені тасқынына қарсы тосқауылдарды, қорғаныс құрылыстарының жағдайын тәулік бойы қадағалап отыр» деп толықтырды ведомство.

Осы күнге дейін республика бойынша 54 703 адам үйлеріне оралды. Эвакуациялау пункттерінде 5291 адам қалды, оның 2239-ы балалар.

11134 тұрғын үй мен 3350 аула аумақтарынан су бұрылып, сорылды. 18,5 миллион текше метрден астам еріген қар  суы сорылып, 7,7 миллион қап пен 1,5 миллион тонна инертті материал төселді.