Астанадағы жол апатынан  аяғынан айырылған қызға 30 млн теңге төленеді

Астанада автобус жолаушылары тап болған жол апатынан кейін екі аяғынан айырылған сегіз жастағы қызға қандай көмек көрсетілетіні туралы әкімдік мәлімдеді. Зардап шеккен қыздың отбасына баспана, қолдау және оңалту шаралары уәде етілді, деп хабарлайды Orda.kz.

Қыздың отбасына көмек  қарамағында осы автобус болған компания тарапынан көрсетіледі. Компания сақтандыру полисі бойынша 19,6 млн теңге көлемінде төлем жасайды. Бұған қоса, автопарк басшылығы 10 млн теңге көлемінде демеушілік көмек көрсетпекші.

Қыздың отбасы Астанаға Ақмола облысынан көшіп келгендіктен, жергілікті билік емделу және оңалту кезеңінде баспана жалдауға көмек ұсынды. Медициналық және психологиялық қолдау ұйымдастырылды, әлеуметтік көмек көрсету мәселелері шешіліп жатыр.

Қалалық денсаулық сақтау басқармасының хабарлауынша, баланың жағдайы тұрақты — ол арнайы бөлімге ауыстырылған. Ауруханада сол апаттан зардап шеккен тағы екі адам ем алып жатыр.

Бұған қоса, астаналық еріктілер сегіз жастағы қызға медициналық көмек пен оңалту үшін қаражат жинауды бастап кетті. Олар өз хабарламаларында зардап шеккен отбасының көпбалалы екенін, анасы бес баланы жалғыз өзі тәрбиелеп отырғанын мәлімдеді.

Бұған дейін хабарланғандай, Астанадағы  жол апатынан 15 адам зардап шеккен болатын. Дәрігерлердің тексеруінен кейін 12 адам үйлеріне жіберілді, үшеуі ауруханаға жатқызылды. 2017 жылы туған қыз ауыр жарақат алып, екі аяғы кесілді. Жол-көлік оқиғасы бойынша қылмыстық іс қозғалды.

Қоғамдық денсаулық сақтау басқармасы Астанада автобус апатынан кейін аяғын кесуге тура келген қыздың жағдайы туралы мәлімдеме жасады. 

Еске салайық, 2 маусым күні Астанадағы Республика даңғылында жолаушылар автобусы бағанаға соғылды. Автобус жүргізішісі  қамалды. 15 адам түрлі жарақат алды. 2017 жылғы қыздың аяғын кесуге тура келді.