Астанада жаңа заманауи емхана ашылды

Астанада 30 мың науқасқа қызмет көрсетуге арналған Қалалық емхананың жаңа бөлімшесі ашылды, деп хабарлайды Orda.kz.

Емхананың ашылу салтанатына Қазақстан Президенті Қасым-Жомарт Тоқаев қатысты.

Денсаулық сақтау министрлігінің хабарлауынша, мекемеде емделушілерге сүт безі ауруларын кешенді диагностикалау мен емдеуге мүмкіндік беретін маммологиялық орталық жұмыс істейді.

«Бұл маммологиялық орталықтың ерекшелігі жоғары кәсіби мамандардың және томосинтезі бар цифрлық маммография, дәстүрлі және вакуумдық аспирациялық биопсия әдістері, хирургқа қатерлі ісіктерді жою жолын көрсететін локализациялық инелер орнату сияқты бірегей диагностикалық технологиялардың болуы»  деп хабарлады денсаулық сақтау министрлігі.

Сонымен қатар, емханада маммологиялық операцияларды да, басқа да хирургиялық араласуларды орындау үшін барлық қажетті құрал-жабдықтармен жабдықталған амбулаториялық хирургия орталығы жұмыс істейтін болады.

«Қаладағы барлық жұмыс істеп тұрған емханалардың жоспарлы қуаттылығы ауысымына 11 мың келушіні қамтиды, ал нақты келушілер саны 19 мың, яғни екі есеге жуық көп. Бүгінде бізде бес толыққанды дәрігерлік амбулатория кешені жетіспейді және жыл сайынғы халық санының өсуін ескере отырып, бұл қажеттілік арта түседі. Осыған байланысты алдағы үш жылда 15 емхана, оның ішінде 12 жекеменшік емхана ашуды жоспарлап отырмыз», - деді елордалық денсаулық сақтау басқармасының басшысы Әлия Рүстемова сапар барысында.

Қазір Астанада 1,5 миллион адамға қызмет көрсететін 44 емхана бар.