Әскерден мүгедек болып қайтқан Ербаян Түркияға қайта аттанды

2 қыркүйек күні таңертең кезінде Алматыдағы 5571 әскери бөлімінен мүгедек болып қайтқан сарбаз Ербаян Мұхтар ата-анасымен бірге Стамбұлға аттанды. Ол емдеудің екінші кезеңі, яғни толық оңалту курсын аяқтауға кетті, деп хабарлайды Orda.kz.

Заңгер Инга Иманбай әлеуметтік желідегі парақшасында Ербаян үшін бұл сапар шешуші кезең екенін жазды. Заңгердің айтуынша, Ербаянның емінің бірінші кезеңін халық жылу жинап көтерген болса, екінші ем-дом шараларын мемлекет қолға алған екен. Ал Стамбұлға ұшуды ішкі істер министрлігі мен қорғаныс министрлігі бірлесіп ұйымдастырыпты. 

Ербаянның ата-анасы денсаулық сақтау министрі Ақмарал Әлназарова мен генерал Қайрат Үмбетовке көрсеткен көмегі үшін алғысын айтып жатыр. Заңгер Ербаянға қатысты мемлекеттік құрылымдардың дұрыс шешім қабылдағанына және көмек қолын созғанына шын жүректен қуанышты екенін жазды. 

Еске сала кетейік, Ербаян Мұхтар басынан соққы алып, ауыр жарақаттың кесірінен төсекке таңылып, сал болып қалған еді. Orda.kz Ербаянның жақындарымен сұхбаттасқан болатын. Олар ұлдарына қастық жасалғанын, ауруханада рұқсатсыз миының бір бөлігін алып тастағанын айтқан еді. Сонымен қатар емге қаражат жоқ екенін де мәлімдеді. Осы жағдайдан кейін Қазақстан халқы Ербаянның еміне жылу жиды. Көптің арқасында сарбаз Түркияға аттанып, ота жасатып қайтты.