Антикор қылмыстық топтар және жүйелі жемқорлықпен күрес туралы баяндады

Сыбайлас жемқорлыққа қарсы қызмет жүйелі сыбайлас жемқорлықпен және ұйымдасқан қылмыстық топтармен күрестегі жетістіктерін баяндады.

Антикордың баспасөз қызметі хабарлағандай, ағымдағы жылы 212 адамға қатысты жүйелі сыбайлас жемқорлықтың 49 фактісі анықталды. Олардың арасында 40 миллион теңгеден астам пара алды деген күдікке ілінген төтенше жағдайлар министрлігі өрт сөндіру қызметінің төрағасы мен Шымкент қаласы және Жетісу облысы төтенше жағдайлар департаментінің басшылары да бар. Олар қамауға алынды.

Сондай-ақ, екі ұйымдасқан қылмыстық топтың іс-әрекетінің жолы кесілді. Павлодар облысында 153 миллион теңге бюджет қаражатын жымқырды деп айыпталған «Ертіс орманы» мемлекеттік орман резерваты қызметкерлеріне қатысты іс тергелуде.

Түркістан облысының білім саласында бюджет қаражатын ұрлаумен айналысқан топ әшкере болды. Келтірілген шығын 3,7 млрд теңге болды. Жетісуда 4,3 миллиард теңге ұрлады деп айыпталған Талдықорған қалалық білім бөлімінің лауазымды тұлғаларына қатысты тергеу аяқталды.

Елордада көліктерді заңсыз рәсімдеп, 1,2 миллиард теңге залал келтірген ұйымдасқан қылмыстық топ мүшелеріне үкім шықты.