«Анасы мен ұлы»: Ақтауда құлаған ұшақтағы қазақтардың кім екені белгілі болды

Бүгін Ақтауда апатқа ұшыраған ұшақ жолаушылары қатарында 1975 жылы туған астаналық Гаухар Жұмағатқанқызы Шәймерденова мен оның ұлы Елдар Жұмағат болғаны белгілі болды, деп хабарлайды Orda.kz.

Orda.kz олардың есімдері жолаушылар тізімінде көрсетілгенімен, құтқарылғандар арасында жоқ екенін анықтады.

Қайғылы оқиға орнында құтқару және тергеу жұмыстары жүріп жатыр.

Ұшақта болған 6 қазақстандықтардан тірі қалғандар жоқ. Қаза болғандардың төртеуі Маңғыстау облысынан — Төлесінов Сәндібек Екібайұлы, 16.11.1988 ж.т., туылған жері: Маңғыстау облысы, Жаңаөзен қаласының тұрғыны, Жұмағұлов Бауыржан Жұмабайұлы, 30.09.1985 ж.т., туылған жері: Маңғыстау облысы, Жаңаөзен қаласының тұрғыны, Махсудова Галина Растамбековна, 12.01.1978 ж.т., туылған жері: Маңғыстау облысы, Ақтау қаласының тұрғыны, қаза болғандардың біреуі Қостанай облысынан — Сәлима Жүтаева есімді азаматша. 

Еске сала кетсек, бүгін, 25 желтоқсан Баку-Грозный бағытында ұшып келе жатқан ұшақ Ақтау қаласы маңына құлады. ҚР көлік министрлігінің дерегіне қарасақ, ұшақта 62 жолаушы, 5 экипаж мүшесі болған. Ұшақ құлаған жерден 4 адамның мәйіті табылды.

Маңғыстау әкімдігінің мәліметіне сүйенсек, ұшақта болған 67 адамның 29-ы аман, бірақ зардап шеккендер бар. 27 адам Маңғыстау облыстық ауруханасына жеткізілді.

Соңғы сапарға аттанған ұшақ жайлы толық ақпаратты тілшіміздің мақаласынан оқыңыз.