Алматыдағы жер сілкінісіне байланысты Тоқаев ТЖМ-не тапсырма берді

Президенттің кеңесшісі және баспасөз хатшысы – Берік Уәли өз әлеуметтік желісінде Қасым-Жомарт Тоқаевтың ТЖМ басшысына тапсырма бергенін мәлімдеді, деп хабарлайды Orda.kz порталы.

Берік Уәлидің мәлімдеуінше Төтенше жағдайлар министрі Шыңғыс Әрінов Алматыдағы жер сілкінісіне байланысты ведомствоның атқарып жатқан жұмыстары туралы Қасым-Жомарт Тоқаевқа баяндаған.

"Мемлекет басшысының тапсырмаларына негізделген іс-қимылдар алгоритмі өз деңгейінде орындалды. Қазір қаладағы жағдай қалыпты, барлық тиісті мекемелер бекітілген жоспарға сәйкес жұмыс істеп жатыр.
Президент министрге мегаполис тұрғындарының амандығын сақтау және Алматыдағы жағдайды бақылауды қамтамасыз ету үшін қала әкімі Ерболат Досаевпен, сондай-ақ қаладағы барлық жауапты мекемелермен тығыз қарым-қатынаста жұмыс істеуді жалғастыруды тапсырды" делінген хабарламада.