Алматыдағы жер сілкінісі салдары: жарықшақтарды тұрғындар өздері жөндейді

Әкімдік жер сілкінісінен кейін тұрғын үйлерде пайда болған жарықшақтарды қалай жоятындарын түсіндірді, деп хабарлайды Orda.kz. 

Қала әкімінің орынбасары Асқар Әмриннің айтуынша, 23 қаңтардан бері тұрғындардан жер сілкінісінен кейін жарықшақтардың пайда болғаны туралы 188 шағым түскен, оның 70-і көпқабатты үйлерде.

 Әкімдік бұл адамдардың өміріне қауіп төндірмейді деп сендіреді. Құрамына әкімдік өкілдері мен сарапшылар кірген жұмыс тобының бағалауынан кейін осындай қорытынды шығарылған.

«Бұл әдеттегі жөндеумен жабылатын қарапайым жарықтар. Көпқабатты тұрғын үй кешені, кондоминиум нысандары ағымдағы жөндеу жұмыстарын жүргізіп, өз қаражаты есебінен бұл жарықшақтарды жабады. Әлеуметтік инфрақұрылымға жататын нысандар бюджет қаражаты есебінен белгіленген тәртіппен қалпына келтірілетін болады», - деді Әмрин Алматы қаласының егжей-тегжейлі макетін таныстыру барысында.

Сондай-ақ ол осы айда ҚазҚСҒЗИ сарапшылары барлық 188 нысанға сараптама жүргізіп, ресми қорытынды беретінін айтты.