Алматыдағы Dostyq Plaza-ның есігіне никаб киіп кіруге тыйым салатын белгі жапсырылды

Алматыдағы Dostyq Plaza сауда орталығында никаб киіп кіруге тыйым салынатын белгі жапсырылды, деп хабарлайды Orda.kz.

Әлеуметтік желіде никаб киіп кіруге тыйым салған Dostyq Plaza сауда орталығының есігіндегі жапсырманың суреті тарады. Есіктегі жапсырма никаб кигендерге кіруге тыйым салатынын білдіреді. 

Бұл жайлы желі қолданушылары қызу талқылап жатыр. Бірі бұны дінге жасалған қысым деп топшыласа, бірі бұған байкот жариялау керектігін алға тартты. Ал кейбірі сауда орталығының басшылары дұрыс әрекетке барғанын айтып, Қазақстанда бетті жабатын киім киюге заң бойынша тыйым салынғанын еске салды.

Айта кетейік, 30 маусым күні Тоқаев қоғамдық орындарда бет-жүзді тануға кедергі келтіретін киім киюге тыйым салатын заңға қол қойып, 12 шілдеден бастап ол заі күшіне енген болатын. Ал осы жағдайдан кейін полиция қызметкерлері рейд жүргізуді бастап кеткен болатын.