Алматыдағы балалар үйінен қашқан 2 қыздың жағдайы белгілі болды

Бағанашылдағы №1 балалар үйінен қашқан 2 қыз табылды. Жасөспірімдердің не үшін қашып кеткені әлі белгісіз, деп хабарлайды Orda.kz. 

16 жастағы Кристина Белгородская және 14 жастағы Маргарита Черепанова 18 шілде күні таңертең балалар үйінен қашып кеткен. Қыздарды Алматы қаласының криминалдық полицейлері Алматы облысынан іздеп тапты.

Олар Бостандық ауданының полициясына жеткізілді. Қыздардың не үшін қашып кеткені анықталып жатыр. 

Еске сала кетсек,  Алматыдағы №1 балалар үйін Қонаев қаласына көшіру туралы шешімге балалар қарсы шығып, автобустың жолын бөгеп, наразылық танытты. Олар кішкентай топтың балаларын алып кетуге қарсылық танытып, қақпаның алдына тұрып алды. Балалар қарсыласқан соң, әкімдік полиция қызметкерлерін шақырып, шара қолданбақ болды. Содан жазықсыз балалардың кейбіреуі жарақат алды. Ақыры Тоқаевтың тапсырмасына сәйкес, балалар үйі көшірілмейтін болды.