Алматыда жойқын соқтығыс болып, бес адам зардап шекті

Апат кеше түнде Сайын даңғылында, Ұлықбек пен Абай көшелерінің аралығында болған. BMW 5  және Chevrolet Cobalt маркалы көліктері соқтығысқан. Куәгерлердің айтуынша, BMW жүргізушісі жоғары жылдамдықпен қатар-қатар келе жатқан көліктерді басып озбақшы болған, деп хабарлайды Orda.kz.       

Бір сәтте ол басқаруды жоғалтып, жол бойындағы Chevrolet Cobalt-қа соғылып, жолдан шығып кетіп, одан бордюрға соғылып, артынша ағашқа тірелген. Соққы соншалықты күшті болғандықтан, машина жарылып кетті: қозғалтқыш, қорап және алдыңғы доңғалақтар жолдың үстіне шашылып жатты, ал сынықтардың бір бөлігі қарсы жолаққа ұшып түскен. 

Екі жүргізушімен қоса BMW-нің үш жолаушысы да зардап шекті, барлығы 5 адам медициналық көмекке жүгінді.

Алматы полициясының хабарлауынша, апат түнгі 04:20 шамасында болған. BMW Сайын көшесі бойымен оңтүстікке қарай қозғалып бара жатқан кезде жол бойындағы Chevrolet-ті қағып, ағашқа соғылған. Жүргізушілердің жылдамдығы мен ішімдік ішкен-ішпегені тексеріледі.

 Зардап шеккендердің жағдайы әзірге белгісіз.

15 қазан күні Алматы облысында жол апатынан екі адам қаза тапты. Көліктердің бірін 13 жастағы бала басқарғаны белгілі болды. 

 15 шілдеде Алматының Боралдай көшесінде МАЗ маркалы кран, №10 маршруттағы автобус және бірнеше жеңіл көлік соғылып ірі жол апаты болды. 23 адам зардап шекті.