Алматыда теракт жасамақ болған шетел азаматтары ұсталды

Ұлттық қауіпсіздік комитеті 2025 жылдың қыркүйегінде Алматы қаласында жоспарланған терактінің алдын алды, деп хабарлайды Orda.kz.

ҰҚК мәліметіне сәйкес, теракт ұйымдастыруға қатысы бар бес шетел азаматы ұсталып, олардың барлығы қамауға алынған. Қазір тергеу жүргізіліп жатыр. Сонымен қатар, биылғы қыркүйек-қазан айларында терроризмді насихаттады деген күдікпен сегіз қазақстандық қамауға алынған.

Осы кезеңде ҰҚК материалдары бойынша террористік және экстремистік қылмыстар жасаған алты адам түрлі мерзімге бас бостандығынан айырылған.

Еске сала кетейік, Алматыда журналист Думан Мұхамедкәрім мен қоғам белсендісі Әйгерім Тілеужанның ісіне арналған баспасөз мәслихаты өтті. Жиынға құқық қорғаушы Бақытжан Төреғожина, Думанның қорғаушысы Ғалым Нұрпейісов, әкесі Алмас Тілепов және Айгерімнің адвокаты Айнара Айдарханова қатысты.  Олар қамауда отырған екі саяси тұтқынның денсаулығының нашарлағанын, медициналық көмектің жетіспегенін және құқықтарының тапталып жатқанын мәлімдеді.