Алматыда Қазақстан мен Ресей қорғаныс министрлерінің келіссөздері өтті

Генерал-полковник Руслан Жақсылықов Андрей Белоусовты жаңа қызметке тағайындалуымен және осы қызметтегі Қазақстанға алғашқы сапарымен құттықтады. Белоусов ҰҚШҰ Қорғаныс министрлері кеңесі отырысына қатысады, деп хабарлайды Orda.kz порталы.

Кездесу барысында тараптар кадр даярлау және бірлескен іс-шараларды өткізу мәселелерін талқылады. Сондай-ақ өңірлік ұйымдар аясындағы өзара іс-қимыл мәселелері талқыланды: Қазақстан 2024 жылы ҰҚШҰ мен ШЫҰ-ға, ал Ресей ТМД-ға төрағалық етеді.

Жақсылықов Белоусовпен «Бірлестік» оқу-жаттығуын шілде айында Батыс Қазақстанда өткізу жоспарымен бөлісті. Бұл жаттығуларға Әзірбайжан, Қырғызстан, Тәжікстан және Өзбекстанның әскери контингенттері қатысады. Оқу-жаттығулардың негізгі мақсаты – қарулы қақтығысты оқшаулау және заңсыз топтарға қарсы тұру бойынша жауынгерлік дайындық тапсырмаларын орындау.

Кездесуде Қазақстан мен Ресейдің қорғаныс және қауіпсіздік саласындағы ынтымақтастығын жалғастырудың, сондай-ақ өңірлік және халықаралық ұйымдар аясындағы өзара іс-қимылды нығайтудың маңыздылығы атап өтілді.