Алматыда ерлі-зайыптылар есірткі өндірді

Алматыда есірткі зертханасын ұйымдастырумен айналысқан ерлі-зайыптылар ұсталды, деп хабарлады Orda.kz ішкі істер министірлігіне сілтеме жасап.

Олар Алматы қаласының Алатау ауданында орналасқан пәтерін есірткі өндірісі орнына айналдырған. Мұнда ерлі-зайыптылардың синтетикалық есірткі затын өндіріп, сауда үшін қаптамаға салып отырғаны белгілі болды. 

«Күдіктілер үйдің жанында ұсталды. ҰҚКД қызметкерлері ұсталғандардан кристалданған затты, ақ түсті шөгінділері бар шыны ыдысты және ақша тапқан. Ал олардың үйін тінту кезінде зертханалық жабдықтар, прекурсорларды сақтауға арналған шыны ыдыстар, магниттік араластырғыш, электр сорғылар, шыны колбалар, ноутбуктер, 265 мың теңге көлеміндегі қолма-қол ақша, ерекше иісі бар өсімдік тектес жасыл зат және басқа да құралдар табылды және тәркіленді», – деді Алматы қалалық ПД есірткі қылмысына қарсы күрес басқармасының бастығы Мұрат Жұмабаев. 

Сот-химиялық сараптамасының қорытындысына сәйкес, тәркіленген зат мефедрон есірткісі болып шықты. Екі күдікті де Алматы қалалық ПД-ның уақытша ұстау изоляторына қамалды.