Алматы тауларында құтқарушыларға арналған капсулалық үйлер салынды

Үлкен Алматы шатқалында, Күмбелсу жоғары таулы гидропостында құтқарушылардың тәулік бойы кезекшілігі үшін капсулалық үй орнатылды, деп хабарлайды Orda.kz.

Төтенше жағдайлар министрлігінің мәліметінше, бұл бақылау гидропосттарының модульдері алғаш рет қолданылып отыр. Мұнда бірден екі капсулалық үй Күмбелсу (Үлкен Алматы өзені) мен Батанда (Түрген өзені) орнатылды. Бұл үйлер шамамен теңіз деңгейінен 2 000 метр биіктікте орналасқан таулы аймақтарда жұмыс істеуге арнайы жасалған.

«Бұл аудандардағы жағдайлар тасқындар мен сел қаупін үнемі бақылап отыруды талап етеді. Бұған дейін осындай алыс және қол жетуі қиын жерлерде кезекшілік ету оңай болмайтын, алайда автономды модульдер орнатудың арқасында енді үздіксіз бақылау жүргізуге болады. Сонымен қатар бақылау посттары аумағында жас ағаш көшеттері отырғызылды» деп жазылған хабарламада. 

Төтенше жағдайлар министрі тауда төтенше жағдайларға жедел ден қою және зардап шеккен туристерге көмек көрсету үшін  ТЖМ-нің қосымша бақылау-құтқару пунктін құруды тапсырды.