Алматы облысында Қытай елінің туын өртеген 12 адам қамауға алынды

13 қараша күні Алматы облысының Ұйғыр ауданында тұрғындар Қытай туын және ҚХР төрағасы Си Цзиньпиннің суретін өртеп, оның видеосын әлеуметтік желіге жариялаған, деп хабарлайды Orda.kz.

Бейнежазбадағы әйел туысы Әлімнұр Тұрғанбайды Қытай билігінің нақақтан-нақақ ұстап әкетіп, қамап, елге жібермей отырғаны үшін осындай әрекетке барғанын түсіндірді. Оның айтуынша, Тұрғанбай төрт ай бұрын Қытайға барғаннан кейін еш себепсіз қамауға алынған.

«Қытай тарапы ешқандай жауап бермей отыр. Сол себепті наразылығымды тоқтатпаймын», — дейді әйел.

Оқиғадан кейін құқық қорғау органдары іске қатысы бар адамдарды анықтап, материалдарды сотқа жолдаған.

«Cот шешімімен 12 азамат ҚР Әкімшілік құқықбұзушылық туралы кодекстің 434-бабы («Кішігірім бұзақылық») бойынша жауапкершілікке тартылып, 15 тәулікке дейін әкімшілік қамауға алынды» деп жазды Алматы облысының полиция департаменті.

Сонымен қатар, тағы алты адамға 20 АЕК көлемінде айыппұл салынғаны хабарланды.

Еске сала кетейік, Әлімнұр Тұрғанбай Қытайда 23 шілдеде ұсталды.  Бұған дейін де Тұрғанбайдың әйелі мен қызы Алматыдағы әкімдік ғимаратының алдында президентке бейнеүндеу жолдады. Олар биліктен Тұрғанбайды Отанына қайтаруға көмектесуді сұраған.

Адам құқықтары бюросы Қазақстанның Сыртқы істер министрлігі Әлімнұрдың қамауға алынғанын растады. Мәліметке зер салсақ, Әлімнұр қос азаматтығы болған соң ұсталған.

«Алайда оның туыстары ресми түрде қытай азаматтығынан бас тартқанын айтады», деп атап өтті Қазақстанның халықаралық адам құқықтары бюросы.

Бұл отбасының билікке алғаш рет жүгінуі емес. Бұған дейін ҚХР консулдығы мен СІМ өкілдігі алдында өткен акциялар үшін оларды ұстап, айыппұл салған. Ал бұл жолы полиция ескерту жасаумен шектелді.