Алматы көшелеріне төселген қыштар «мұқтаж отбасының» үйіне қалай жол тартты?

Алматының Медеу ауданы әкімдігі Уәлиханов көшесіндегі қыштарға қатысты дауға жауап берді. Әкімдік өкілдері материалдың ескіргенін айтып, мұқтаж отбасыға берілгенін жеткізді, деп хабарлайды Orda.kz. 

Бұған дейін белсенді Санжар Боқаев билік өкілдерін жаңа қыштарды жеке нысандарға әкетіп жатыр деп сынға алған еді. 

Аудан әкімі Еркебұлан Оразалин Шевченко мен Қазыбек би көшелерінің арасындағы аумақтағы қыштардың ауыстырылып жатқанын растады. Айтуынша, ескі материал 20 жылдан астам уақыт қызмет етіп, техникалық тұрғыда ескірген. 

Сондай-ақ, жаңа шамдар, қоршаулар мен архитектуралық формалар орнатылмақ. Бұған 296 миллион теңге жұмсалады. Дәл осыншама қаржы Қарасай батыр көшесіндегі жұмыстарға да бөлінеді.

«Желекжолдағы қыштар 2004 жылы төселген, ол шамамен 21 жыл қызмет етті. Өткен жылы оны ішінара ауыстыруға тырысқан едік, бірақ қажетті үлгі табылмады. Түрі, пішіні мен қыры сәйкес келмеді. Сондықтан жабындыны жартылай ауыстыру мүмкін болмады. Бұдан бөлек, бұл түрдің өзі ескіргендіктен, әкімдік қыштарды толықтай жаңасына алмастыру туралы шешім қабылдады», – деп түсіндірді Еркебұлан Оразалин.

Шарт бойынша алынған қыш кәдеге жаратылуы тиіс болған. Алайда оны жоюға қимай, 90 шаршы метр материал «мұқтаж отбасыға» мердігерлердің келісімімен берілген. Қалған қышты, шенеуніктердің айтуынша, компанияның базасында сақталып, болашақ жобаларға қайта қолданылады.