Ақтөбеде орамалды оқушылар баратын мектепте мерекелік жиынды есікті кілттеп өткізді

Ақтөбеде ер адамдарға кіруге рұқсат етілмейтін қыздар мектебі биылғы оқу жылын 400-ге жуық баламен бастады. Мектептегі бүгінгі мерекелік шараға тек әйел адамдарға ғана қатысуға рұқсат берілді.

Бұл туралы Orda.kz хабарлайды.

Ақтөбе қаласындағы «Құнан» қыздар мектеп-лицейі бүгінгі мерекелік жиынды ғимарат есігін кілттеп өткізді. Күзет қызметі мұны «оқушылар орамалды шешіп тұрған соң, ер адамдарды кіргізуге болмайды»  деп түсіндірді. БАҚ өкілі екенімізді хабарлаған соң ғана мектепке кірдік.

«29 тамыз күнгі ақпарат бойынша 397 оқушы бар. Бірі келіп, бірі кетіп жатыр. Қазір соңғы ақпарат жоқ. Мектеп 420 орындық, балаларымыз екі ауысыммен оқиды. Барлығы 26 сынып бар. Биыл 2 қазақ сыныбы ашылды. Алғашқы қоңырауға қатысқан бірінші сыныптың барлық баласы бантикпен келді. Балалар сабақта орамалсыз отырады. Мектепке кіргеннен орамалдарын сөмкелеріне салып алады. Бізде ер балалар оқымайды, ер адамдар жоқ. Электрик, күзетші, шаруашылыққа жауапты ер адамдар кірерде хабарлап айтамыз.  «Қыздар шығып қалмасын, мына жерде ағайлар жұмыс істеп жатыр» деп ескертіледі»,- деді Құнан мектеп-лицейінің директоры Айгүл Қабиқызы.

Мектеп басшысының айтуынша, білім ордасында Атырау, Орал қалаларынан келген оқушылар да бар. Бірақ олар отбасымен осы қалаға көшіп келгендіктен жергілікті тұрғын саналады. Сонымен қатар бұл қыздар мектебінде облыстың Темір, Алға,  Хромтау аудандарынан келген балалар бар. Олар таксимен қатынайды.

Мектеп оқушыларының дені орамалды оқушылар. Тек қыз балаларды ғана қабылдайтын мектептің ұстаздары да әйел адамдар.

Ал қыздар мектебіне бармағанын айтқан облыстық білім басқармасының басшысы білім ордасының төрт жылдан бері жұмыс істеп тұрғанын  жеткізді.

«Құнан» мектеп-лицейі» 420 оқушыға арналған. 2019- 2020 оқу жылынан бастап мектепте қыз балаларға арналған арнайы кластар ашылды. 2023-2024 оқу жылында 420 оқушы қабылданады, қазіргі таңда 397 оқушы тіркелген. Барлығы қыз балалар. 1-класқа 35 оқушы қабылданған. Мектеп формасы толығымен сақталынып оқытылады»,- деді облыстық білім басқармасының басшысы Жайық Сұлтан.