Ақтөбе облысында 3 баланың өмірін қиған апаттың мән-жайы белгілі болды

Ақтөбе облысында жас футболшылар қаза болған жол апатының мән-жайы белгілі болды.

Бұл туралы Диапазон хабарлайды.

Мәлім болғандай Әйтеке би ауданындағы Қарашатау мектебінің балалары бұған дейін де жеке қор ұйымдастырған футбол жарыстарына қатысып келген. 7 тамыз күні олар Маңғыстау облысы, Ақшұқыр ауылында өтетін турнирге жолға шығады. Жаттықтырушы командадағы 8 баланың ата-анасының келісімін алып, екі көлікпен ауылдан шыққан. Бірінші көлікте жаттықтырушы мен бір ата-ана, ҚАЖК қызметкері мен 5 бала, екінші көлікте 3 бала болды.
 
Облыс әкімдігі оқиға себептерін анықтайтын жұмыс комиссиясын құрып, тергеу амалдарын жүргізуде. Ақтөбе облыстық полиция департаменті басшысының орынбасары Ғалым Байжанов күдікті — MAN жүк көлігінің жүргізушісі уақытша ұстау изоляторына қамалғанын айтты. 

Сонымен қатар, абайсызда кәмелетке толмағандардың өліміне әкеп соқтырған балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау фактілері бойынша сотқа дейінгі тергеу басталды.