Ақтаудағы AZAL ұшағының апаты: тергеу қашан аяқталады?

AZAL әуе компаниясына тиесілі Embraer-190 ұшағының апатын тергеу әлі аяқталған жоқ. Үкіметте өткен брифингте көлік вице-министрі Максат Қалиақпаров комиссия жұмысының қазіргі барысы туралы айтты, деп хабарлайды Orda.kz.

Журналистер: «тергеу жыл соңына дейін аяқтала ма?» деп сұрағанда, ол тергеу жалғасып жатқанын және күрделі сараптамаларды қамтитынын жеткізді.

«Үш айдан кейін алғашқы алдын ала қорытындылар толық көлемде ұсынылды. Қазір тереңдетілген тергеу жүріп жатыр. Онда өте күрделі сараптамалар мен ауқымды жұмыс бар. Тергеу аяқталған соң, алдыңғы есеп сияқты, толықтай БАҚ-қа ұсынылады. Мерзім бойынша қазір нақты айта алмаймыз. Бұл — өте маңызды мәселе, сондықтан нақты уақытын айту қиын. Бірақ жыл қорытындысы бойынша ақпарат береміз», — деді Қалиақпаров.

Еске салайық, Embraer-190 ұшағы 2024 жылдың 25 желтоқсанында Ақтау портының маңында құлаған. Бортта 67 адам болған, олардың 38-і көз жұмды. Қайтыс болғандардың арасында Қазақстанның алты азаматы бар.

Бұл қайғылы оқиға Әзірбайжан мен Ресей арасындағы шиеленісті күшейтті, себебі әуе кемесінің Ресей әуе кеңістігінде зақым алғаны айтылған.