АҚШ пен Өзбекстан 35 млрд доллар болатын келісімге келді — Трамп

Орталық Азия елдерінің басшылары қатысқан кездесу аяқталғаннан кейін АҚШ президенті Дональд Трамп Өзбекстанмен 35 миллиард доллар болатын келісім жасағаны туралы мәлімдеді, деп хабарлайды Orda.kz.

Трамптың айтуынша, алдағы үш жылда Өзбекстан АҚШ экономикасына 35 миллиард доллар болатын инвестиция салып, өнімдер сатып алмақ.

«АҚШ пен Өзбекстан арасындағы тамаша Сауда және Экономикалық келісім туралы хабарлауға қуаныштымын. Келесі үш жылда Өзбекстан шамамен 35 миллиард доллардың көлемінде инвестиция салады. Ал алдағы он жылда бұл көрсеткіш 100 миллиард доллардан асады. Бұл қаржы АҚШ-тың стратегиялық маңызды салаларына — минералдар, авиация, автокөлік бөлшектері, инфрақұрылым, ауыл шаруашылығы, энергетика, химия өнеркәсібі және ақпараттық технологияларға бағытталады. Өзбекстан президенті Шавкат Мирзиёевке ризалығымды білдіремін. Бұл екі ел арасындағы ұзақ әрі табысты ынтымақтастықтың бастауы болады деп сенемін», – деп мәлімдеді Трамп. 

Алайда Fox Business мәліметінше, АҚШ пен Өзбекстан тарапынан мұндай келісім жөнінде ресми құжат не растау әзірге жарияланған жоқ. АҚШ-тың Сауда министрлігі, Сауда өкілі кеңсесі немесе Өзбекстанның Инвестициялар министрлігі де мәміленің егжей-тегжейін түсіндіретін қандай да бір мәлімдеме таратпаған. Трамптың жазбасы Ақ үйде Орталық Азия елдерінің, соның ішінде Өзбекстан президенті Шавкат Мирзиёевтің қатысуымен өткен кездесуден кейін көп ұзамай жарияланды. Кездесуде АҚШ әкімшілігі үшін стратегиялық минералдардың маңыздылығы ерекше атап өтілді.

Еске сала кетейік, АҚШ-тың мемлекеттік хатшысы Марко Рубио Орталық Азия елдеріне сапарға шығуды, соның ішінде Қазақстанға келуді жоспарлап отырғанын мәлімдеді.