Ақмола облысында әкесі мен баласы өртке оранған үйден үш баланы аман алып қалды

Ақмола облысы Біржан Сал ауданы Үлгі ауылының тұрғындары Ерлан мен Мирас Тоқсанбаевтар нағыз ерлік жасады. Әкесі мен баласы жалын шарпыған үйден үш бірдей баланы аман алып шықты, деп хабарлайды Orda.kz.

24.kz телеарнасының мәліметінше, өрт көпбалалы ана Юлия Черкасскаяның үйінен шыққан. Оқиға кезінде үйде бес бала болған. Екеуі өздігінен сыртқа қашып шықса, қалған үшеуін ауыл тұрғыны Ерлан Тоқсанбаев пен оның ұлы Мирас санаулы минуттарда алып шығыпты.

«Газ балонын сыртқа шығарып, электр сымдарын ажыраттым. Терезені сындырып, ішке кіріп, балаларды терезеден бір-бірлеп шығардық. Бірі терезе алдында, екеуі іш жағында жатыр екен», – дейді Ерлан Тоқсанбаев.

Балаларды аман алып шыққаннан кейін бірнеше минут өткен соң, үйде қалған газ балоны жарылып кеткен. Төтенше жағдай қызметі өртті дереу сөндірген. Өрттің себебі электр сымдарының қысқа тұйықталуынан болғаны анықталды.

Балалардың анасы Юлия Черкасская көз жасын тыя алмай, құтқарушыларға алғысын білдірді.

«Балаларымды жалыннан аман алып шыққан адамдарға мың алғыс. Құдайға шүкір, бәрі тірі. Қатты қорықтым, бірақ қазір бәрі жақсы», – деді ол.

Қазіргі уақытта отбасына материалдық көмек көрсетіліп жатыр. Ерлан мен Мирас Тоқсанбаевтар мемлекеттік наградаға ұсынылды.