Әкесін соққыға жығып өлтірген кісінің әйеліне де қылмыстық іс қозғалды

Түркістанда ер адам өзінің қарт әкесін өлімші етіп сабаған. Бүгін күдіктінің әйеліне қатысты да қылмыстық іс қозғалғаны белгілі болды, деп хабарлайды Orda.kz.

Еске салар болсақ, ер адамның қарияны ұрып-соғып жатқан видеосы тараған еді. Кадрларда беті қан болған ақсақал көрінеді. Үлкен кісі орнынан тұра алмаған соң, оны ұрған жігіт әйелін шақырып, екеуі бірге қартты сүйрей бастайды.

Кейін белгілі болғандай, бейнежазбадағы адам – Түркістан облысының тұрғыны, ал соққыға жығылған оның қарт әкесі екен. Келіні бұл әрекетке тосқауыл болмаған. Жантүршігерлік кадрларды көршісі жасырын түсіріп, жариялаған.

Атасы қаза тапқаннан кейін ұлына қатысты ҚР ҚК-нің 106-бабының 3-бөлігі бойынша «жәбірленушінің өліміне әкеп соққан денсаулыққа қасақана ауыр зиян келтіру» дерегімен қылмыстық іс қозғалды. Күдікті ұсталып, уақытша ұстау изоляторына қамалды.

Сондай-ақ, күдіктінің әйеліне де тергеу жүргізіліп жатыр. Қылмыстық іс ҚР ҚК-нің 109-1-бабының 2-бөлігінің 3-тармағы бойынша «айыптыға айқын дәрменсіз күйде немесе одан материалдық не өзге де тәуелділікте болған адамға күш қолдану» дерегімен қозғалды.

«Сотқа дейінгі тергеу барысында болған оқиғаның барлық мән-жайын анықтауға бағытталған барлық қажетті тергеу әрекеттері жүргізіледі. Оның нәтижесі бойынша тиісті процессуалдық шешім қабылданады. Сонымен қатар тергеу барысында арызда келтірілген барлық уәждер тексеріліп, аяқталған соң қылмыстық процеске қатысушылардың әрекеттеріне құқықтық баға беріледі»,  деп мәлімдеді Түркістан облысының ПД.

Полиция сондай-ақ зейнеткер қайтыс болмай тұрып, ешбір адамның осы жағдайды мәлімдемегенін атап өтті.