Абай облысында көлік қаққан екі баланы мінгізген ұшақ Астанаға шұғыл түрде ұшып кетті

Абай облысында көлік қағып зардап шеккен екі бала мінген ұшақ 13:04-те Үржар әуежайынан Астанаға шұғыл түрде ұшып кетті. Бір бала станционарда қалды, деп хабарлайды Orda.kz өңірдегі  Абай ақпарат басылымына сілтеме жасап.

19 тамыз күні сағат 16:00 шамасында Бестерек ауылында 55 жастағы Toyota автокөлігінің жүргізушісі рөлге ие бола алмай, үй қақпасының жанында, жолдан шамамен 10 метр қашықтықта тұрған балаларды қағып кеткен еді.  

Редакцияның қолына түскен кадрлардан көліктің қоршауды қиратып, оның астында балалардың қалып қойғаны анық көрінеді. Үш, екі және сегіз жастағы балалар көз жұмды. Олардың бірі ауруханаға барар жолда қайтыс болды. Тағы үш бала — алты және тоғыз жаста — ауыр жарақатпен Үржар аудандық ауруханасына жатқан болатын. Бүгін зардап шеккен екі бала мінген ұшақ шұғыл түрде Астанаға жол тартты.

Пациенттерді Астана қаласындағы №2 көпбейінді қалалық балалар ауруханасына госпитализациялау туралы шешім қабылданды.

Бортта балаларды дәрігерлер бригадасы: ҰШМҮО реаниматологы Е. Шақан, №2 көпбейінді қалалық балалар ауруханасының травматологы Н. Жәкіпов және Ұлттық нейрохирургия орталығының нейрохирургы С. Сейітбеков алып кетті.

Оқиға орнында аудандық ауруханада облыстық және республикалық деңгейдегі мамандардан құралған мультидисциплинарлық бригада барлық диагностикалық тексерулерді жүргізіп, зардап шеккендердің жағдайына баға беріп, шұғыл ем жоспарын құрды.

Жағдайдың тұрақсыздығын ескере отырып, тоғыз жасар қыз пациенттердің бірі Абай облысының бас штаттан тыс анестезиолог-реаниматологы Д. Кәрімовтың бақылауында жағдайы тұрақталғанша стационарда қалады.

Полицияның мәліметінше, жүргізуші ұсталып, қазір уақытша ұстау изоляторында отыр. Сараптама оның апат кезінде мас болмағанын растады. 55 жастағы азаматтың тегі Аңсаев. Жүрек ауруы және эпилепсиясы бар. Оқиға болған күні ұстамасы ұстап қалып, рөлге ие бола алмаған көрінеді.