9,5 миллион гектар жер мемлекет меншігіне қайтарылды

Қазақстанда комиссия арқылы 9,5 миллион гектар жер мемлекет меншігіне қайтарылды, деп хабарлайды Ауыл шаруашылығы министрлігі.

«9,5 миллион гектар мемлекетке қайтарылды. Сонымен қатар, олар меншік иелерін қосымша 3,2 миллион гектар жерді айналымға енгізуге мәжбүрледі. Қазір барлығы 12,7 миллион гектар жер қаралуда»  делінген  пайдаланылмаған және заңсыз берілген жерлерді қайтару жөніндегі комиссия отырысының хабарламасында. 

Ақпаратқа сәйкес, нәтижеге озық өңірлер есебінен қол жеткізілген, дегенмен белгіленген көрсеткіштерден 30%-дан 50%-ға дейін артта қалған аудандар да бар.

Қазақстан Республикасы Ауыл шаруашылығы министрлігі Жер ресурстарын басқару комитеті қызметкерлері 2,1 млн гектар жерді пайдаланушыларға қатысты 1174 жоспардан тыс тексеру жүргізді: жер заңнамасын бұзушылықтарды жою туралы 1,45 млн гектар жерге қатысты  852 ұйғарым шығарылды, 553,3 мың гектар жерге қатысты  209 материал сотта қаралды.

Сондай-ақ, 2022 жылдың басынан бері 836,5 мың гектар ауыл шаруашылығы мақсатындағы жерлерді беру бойынша әкімдіктердің 566 заңсыз шешімі анықталды. Оның ішінде 153 шешімнің күші жойылса, қалған 413 шешімнің күші жойылуда.