464 дана ақбөкен мүйізін шатырында заңсыз сақтаған ер адам ұсталды

Жетісу облысында 464 дана ақбөкен мүйізін шатырында заңсыз сақтаған 39 жастағы ер адам ұсталды. 

Бұл туралы ішкі істер министрлігі хабарлады. 

Жетісу облысы бойынша ПД ұйымдасқан қылмысқа қарсы күрес, шекара қызметі мен ҰҚК қызметкерлерімен бірлесе отырып, өсімдіктер мен жануарлардың сирек кездесетін және құрып кету қаупі төнген жануар бөліктерімен заңсыз айналысқан күдіктіні ұстады. Зерттеу нәтижесінде күдікті мемлекетке 1 миллиард 284 816 000 теңге шығын келтірген.

«Жедел-іздестіру іс-шаралары барысында Панфилов ауданы аумағында 39 жастағы ер адам ұсталды. Тінту кезінде үйдің шатырынан скочтпен оралған 7 картон қорап табылды. Бұл қораптардың ішінде 464 дана ақбөкен мүйізі болған»,– деп атап өтті ПД бастығының орынбасары Елдар Әбдікенов.

Табылған мүйіздерге олардың шығу тегі мен түпнұсқалығын анықтауға мүмкіндік беретін сот-биологиялық сараптама тағайындалды. 

Сотқа дейінгі тергеу жалғасуда.