280 миллион теңгеге үй мен көлік алған: Шымкентте тағы бір зергерлік қаржы пирамидасы әшкереленді

Бұл жолы Қаржылық мониторинг агенттігінің департаменті Mooni Gold қаржы пирамидасының жұмысын тоқтатты, деп хабарлайды Orda.kz.

Сценарий бұрыннан таныс — біз мұндай жағдайлар туралы бұған дейін де жазғанбыз. Алаяқтар өздерін зергерлік компания ретінде таныстырып, адамдарға жоғары табыс уәде еткен — салынған қарражатты 20-30%-ын бес ай ішінде қайтарамыз деген.

Алайда, шын мәнінде, алғашқы салымшыларға ақша жаңа қатысушылардың жарналары есебінен төленген.

Аталған қаржылық схемаға 1000-нан астам адам тартылған. Адамдар жалпы сомасы 500 миллион теңгеден астам қаржы салған.

Ұрланған ақшаның бір бөлігіне күдіктілер 280 миллион теңгеге үй мен көлік сатып алған. Қазіргі таңда сот бұл мүлікті бұғаттады.

Тінту кезінде 15 миллион теңге көлемінде қолма-қол ақша және 28 миллион теңгеден астамға бағаланған 67 алтын әшекей тәркіленді.

Көптеген салымшылар пирамиданың уәдесіне сеніп, пәтерлері мен көліктерін кепілге қойып, несие алып ақша салған. Жәбірленушілердің бірі — зейнеткер әйел — өз пәтерін кепілге қойып, 67 миллион теңгесін алаяқтарға берген.

Сызбаны жүзеге асыру үшін ұйымдастырушылар «дропперлерді» яғни, өзге салымшылардың ақшасы аударылған және оны алып беретін тұлғаларды пайдаланған.

Қазір күдіктілер екі айға қамауға алынған.

Айта кетейік, былтыр Қазақстанда жарты жылда 36 қаржы пирамидасы анықталды. Биыл Түркістан облысында қаржы пирамидасын ұйымдастырған 20 адам сотталды.