2023 жылы Ұлттық қорға түсетін салық 26,7%-ға кеміген

2023 жылы Ұлттық қорға 4,5 трлн теңге салық пен төлемдер түсті, деп хабарлайды Orda.kz.

Мемлекеттік кірістер комитетінің мәліметінше, 2022 жылы Ұлттық қорға түскен қаражат көлемімен салыстырғанда (6,4 трлн теңге) кірістер 26,7 пайызға азайған.

Төлемдер бойынша алдыңғы жылдардағыдай мұнайлы өңірлер көш бастады. Атырау облысы Ұлттық қорға 2,6 трлн теңге (2022 жылы – 3,6 трлн теңге), Батыс Қазақстан облысы – 946,6 млрд теңге (2022 жылы – 1,3 трлн теңге), Маңғыстау облысы – 582,2 млрд теңге (2022 жылы – 895) теңге аударған.

Сондай-ақ, қазынаға Ақтөбе облысынан 147,7 миллиард теңге, Қызылорда облысынан 120 миллиард теңге, Астанадан 115,6 миллиард теңге түсті.

Төлем түрлері бойынша түсімдерді қарастыратын болсақ, ең үлкен көлем мұнай секторындағы компаниялар төлейтін ҚӨС салығына келеді. Салықтың бұл түрі бойынша Ұлттық қорға 1,5 триллион теңге түсті. Мұнай компанияларынан түскен пайдалы қазбаларды өндіру салығы шамамен 1,3 трлн теңге болды. Ал жасалған келісім-шарттар бойынша өндіруді бөлудегі Қазақстан үлесі 1 трлн теңгеден асқан.