«20 жас жігіт ұсталды»: Әл-Фараби атындағы ҚазҰУ-де төбелес болды ма?

Telegram-арналардың бірінде Әл-Фараби атындағы Қазақ ұлттық университетінде төбелес болды деген ақпарат тарады. Төбелестің болғанын Алматы қалалық полиция департаменті растады, деп хабарлайды Orda.kz.

Orda.kz тілшісіне полиция департаменті қылмыстық іс қозғалғаны жайлы хабарлады.

«Бостандық аудандық полиция басқармасы 20 жас азаматтың қатысуымен болған бұзақылық фактісі бойынша қылмыстық іс қозғады. Қақтығысқа қатысқандардың барлығы ұсталып, полицияға жеткізілді. Қазіргі уақытта оқиғаның барлық мән-жайы анықталып жатыр»,  деп мәлімдеді полиция департаменті. 

Алайда оқу орны бұл ақпаратты өз аумағында болмаған деп мәлімдеді.

«Бостандық ауданының ПБ хабарлауынша, оқиға 2024 жылғы 24 қыркүйекте сағат 02:52-де Попов пен Бальзак көшелерінің қиылысында болған. Тараптар арасындағы кикілжің  Әл-Фараби атындағы ҚазҰУ аумағынан тыс жерде тіркелді.  Қазіргі уақытта болған оқиғаның мән-жайы анықталып жатыр»,  деді ҚазҰУ баспасөз қызметі.