15 жыл бойы қашып жүрген әйел Ресейден Қазақстанға экстрадицияланды

Алматылықтардың 3,7 миллиард теңгеден астам қаржысын жымқырған әйел Ресейден экстрадицияланды, деп хабарлайды Orda.kz. 

15 жыл бойы қашып жүрген әйел алаяқтыққа қатысы бар деген күдікпен 2007 жылы халықаралық іздеуге жарияланған.

Бас прокуратураның мәліметінше, 2005 жылдан 2007 жылға дейін Өзбекстан азаматы болған әйел құрылыс компаниясында есепші болып жұмыс істеп, үлескерлерден ақша алған. Ол аяқталмаған тұрғын үйлердің төлеміне жалған түбіртектер жазып беріп, оларды еш жерде есепке алмаған.

«Оның және басқа да қылмысқа қатысушылардың әрекеттерінен Алматы қаласының 80-нен астам тұрғыны зардап шекті. Жалпы залал мөлшері 3,7 миллиард теңгеден асқан», деп хабарлады ведомство. 

Күдікті 2023 жылдың желтоқсан айында Ресей Федерациясының Краснодар өлкесінде ұсталды. Бас прокуратураның сұрауымен ол Қазақстанға экстрадицияланды. Қазіргі уақытта әйел тергеу изоляторында. Оған 5 жылдан 10 жылға дейін бас бостандығынан айыру және мүлкін тәркілеу жазасы тағайындалуы мүмкін.