15 жастағы қызды жүкті қылған 71 жастағы туысының ісін жылы жапқан полицейлер тексерілуде

Түркістан облысының Келес ауданында 15 жастағы қызға зорлық көрсетіп, жүкті еткен 71 жастағы ер адамға қатысты іс бойынша полиция қызметкерлері тексеріліп жатыр, деп хабарлайды Orda.kz.

Бала құқықтары жөніндегі уәкіл Динара Зәкиева мәлім еткендей, Келес аудандық полиция бөлімі істі номенклатуралық есептен алып тастаған. Осыған байланысты ішкі істер министрлігі мен облыстық прокуратура қызметтік тексеріс бастаған.

Күдіктіге қатысты «Зорлау» бабымен іс қозғалған. Зорлық көрсеткен адамның жәбірленушінің туысқан атасы екені анықталды. Қыз биыл қаңтарда босанған, ал жүктілігін отбасы жеті ай өткенде ғана білген. Күдікті көрші үйде тұрып келген және өз кінәсін мойындаған.

Кәмелетке толмағанның анасы ресми арызды тек қазан айында жазған.

Бұған дейін Ақтөбе облысында да осындай жағдай тіркелген еді. Өгей әкесінен зорлық көріп, сабақ үстінде толғатқан оқушының оқиғасы қоғамда үлкен резонансқа ие болды.