115 млн долларға Байқоңырды жалға алды: Қазақстан бұл бағаны қайта қарай ма?

Қазақстан Байқоңырдың кейбір бөлігін жалға беруден бас тартып жатыр. Ал Ресей әлі де бұрынғы ақшаны төлеп отыр. Бұл мәселеге қатысты цифрлық даму министрі пікір білдірді, деп хабарлайды Orda.kz.

Жасұлан Мадиевтің айтуынша, Қазақстан Байқоңыр ғарыш айлағы үшін Ресей жыл сайын төлеп отырған жалдау ақысын қайта қарастыруды жоспарлап отырған жоқ. Оның сөзінше, бұл қаражат экономикалық факторлардың бәрін ескере отырып қойылған толықтай орынды баға.

«Қазіргі таңда бұл мәселе талқыланып жатқан жоқ. Біз 115 миллион долларды орынды баға деп есептейміз», – деді министр.

Министрдің айтуынша, доллардағы инфляцияға қарамастан, бұл есеп Қазақстан үшін тиімді. Себебі ел ішіндегі шығындар теңгемен өтеледі.

«Долларға инфляция бар. Бірақ теңгедегі инфляция одан да жоғары, ал доллар бағамы тұрақты. Қазақстан тарапы көтеретін барлық шығындар ұлттық валютада жүзеге асырылады. Сондықтан факторлардың бәрін ескерсек те, бұл баға Қазақстанға әлі де тиімді», – деді Мәдиев.

Еске сала кетсек, Владимир Путин Байқоңыр қаласын дамыту үшін көп жұмыс істеп жатқанын алға тартқан еді.