1 миллиард теңге ұрлап іздеуде жүрген ломбард басшысы ұсталды

Қарағандыда 1 млрд теңге ұрлағаны үшін іздеуде жүрген ломбард филиалының директоры ұсталды, деп хабарлайды Orda.kz  ҚР ІІМ баспасөз қызметіне сілтеме жасап.

«Қарағандыда мемлекетаралық іздеуде жүрген адам ұсталды. Ер адам бөтеннің мүлкін иемденіп, жымқырды деген күдікке ілінді. Ол өзінің сыбайластарымен Шымкенттегі ломбардтардың бірінің филиалының директоры болған кезінде ЖШС-нің 1 млрд теңге көлеміндегі ақшасын жымқырған» деп жазылған хабарламада.

Алматыда криминалдық полиция қызметкерлері аса ірі көлемде алаяқтық жасағаны үшін халықаралық іздеуде жүрген ер адамды ұстады.

«Ол 2023 жылдың қараша айында жәбірленушіге тендерге қатысу кезінде жақсы пайда әкелемін деп уәде беріп, кәсіпкерлік қызметті желеу етіп, 76 миллион теңгеден астам ақша мен Lexus 570 автокөлігін иемденген»,  деп түсіндірді полицейлер. 

Сонымен қатар Маңғыстау облысындағы Бейнеу вокзалында ұрлық жасағаны үшін полицейлер іздеп жүрген көрші мемлекеттің азаматы ұсталды. Ақпаратқа сәйкес, 2024 жылы «ер адам Атырау қаласында бір топ адаммен бірге базар қоймасынан 19 миллион теңгенің тауарын ұрлаған».

Барлық айыпталушылардың уақытша ұстау изоляторына қамалғаны атап өтілді.

«Ішкі істер министрлігі қоғамда «Құқықтық тәртіп» қағидатын нығайту бойынша жұмыстарды жалғастыруда, оның ішінде әртүрлі қылмыстар жасаған іздеуде жүрген тұлғалардың орналасқан жерін анықтауға және жазаның бұлтартпастығын қамтамасыз етуге бағытталған»,  деп атап өтті ІІМ.