Жалған диплом пайдаланған 260 жаттықтырушы атақтарынан айырылды

Антикордың ресми өкілі Данияр Бекайдаров спорт саласында жалған дипломдар пайдалану фактілері анықталғанын мәлімдеді, деп хабарлайды Orda.kz.

Арман Әшімов халықаралық дәрежедегі спорт шебері және жаттықтырушы атақтарын заңсыз алған бірнеше адамның есімдерін атағаннан кейін тексеріс жүргізілді.

«17 өңірде жаттықтырушылық-оқытушылық және спорттық қызметпен айналысатын адамдардың жалған диплом пайдаланған 260-тан астам фактісі анықталды. Олардың атақтары алынып, диплом бергендер сотталды», — деді Бекайдаров.

Барлық материалдар полицияға тапсырылды. 180 адамның еңбек шарты бұзылды.

Наурыз айында Арман Әшімов Instagram парақшасында жалған спортшыларға «Қазақстанның еңбек сіңірген жаттықтырушысы» және «Халықаралық дәрежедегі спорт шебері» атақтары берілгенін мәлімдеді. Осы мәлімдемеден кейін олардың кейбірі атақтарынан айырылды.