Вьетнамда «Яги» тайфуны салдарынан 24 адам қаза тапты

Вьетнамның солтүстік-шығыс жағалауында соққан «Яги» тайфуны 24 адамның өмірін қиды, 299-ы жараланды, деп хабарлады Orda.kz. 

Reuters мәліметіне қарасақ, биылғы жылы Азиядағы ең күшті деп саналатын дауыл көшкін мен су тасқынына әкеліп, Куангнинь және Хайфон провинцияларында электр қуаты мен коммуникацияның сөндірілуіне себеп болды.

Метеорологтар соңғы 24 сағат ішінде аймақта 208-ден 433 миллиметрге дейінгі жаңбыр жауып, одан әрі су тасқыны мен көшкінге әкелуі мүмкін болғандықтан қауіп жалғасуы мүмкін екенін ескертті.

Билік Ланг Сон, Као Банг, Йен Бай және Тай-Нгуен провинцияларындағы жағдайды бақылауға күш салуда, өйткені бұл аймақтарда су тасқыны мен көшкін қаупі жоғары.

Бұған дейін «Яги» тайфуны Қытайдың Хайнань аралында кемінде екі, Филиппинде 16 адамның өмірін қиған болатын.