ТЖД Алматыдағы ірі өрттің жай-жапсарын мәлімдеді

Алматылық өрт сөндірушілер Бостандық ауданындағы жұмыс істемейтін моншада тұтанған ірі өртті ауыздықтап, өрттің жақын маңдағы үйлерге таралуына жол бермеді, деп хабарлайды Оrda.kz.

Ведомствоның мәліметінше, 2 қыркүйек күні түнгі сағат 23:13-те «Нұрлытау» шағын ауданында болған  өртке жоғары дәрежедегі өрт сөндіру бөлімшелері жіберілді.

«Өрт орнына жеткен кезде монша кешені аумағында салынып жатқан екі қабатты ағаш үйдің лаулап жанып жатқаны анықталды. Өрт аумағы 600 шаршы метр болады. Ғимарат опырылып түсті. Небәрі бірнеше метр жерде қамыспен қапталған екі ғимарат болды. Өрттің екі тұрғын үйге таралу қаупі төнді. Жоғарғы температура салдарынан жақын тұрған көпқабатты  үйдің екінші және үшінші қабаттарының  сыртқы қаптамалары  ери бастады», - деп хабарлады Алматы қалалық ТЖД.

Оқиға орнына штабтың барлық дерлік қызметкерлері жетті, екі өрт сөндіру орны құрылды, көрші үйлерді қоршап, қорғау үшін оқпандар енгізілді.

«Өртті сөндіру аумақтағы су қорының  «таяз» болуынан да қиындай түсті. Алайда барлау барысында өрт сөндірушілер гидранттарға айнымалы ток орнатып, сол арқылы судың үздіксіз берілуін қамтамасыз етті. Сонымен қатар, «Алматы Су» мекемесінің  суару техникасы іске тартылды», - деп нақтылды департамент.

Өрт 00:27-де оқшауланып, 01:20-да жойылды. Құрбандар мен зардап шеккендер жоқ.

«Дер кезінде қабылданған шаралар арқылы өрт сөндірушілер  кешеннің едәуір бөлігін: қамыспен қапталған екі ғимарат, бір қабатты ағаш ғимарат, екі тұрғын үй, оның бірі көпқабатты үй, сонымен қатар ішінде  автокөліктері бар гараждар тізбегін өрттен қорғап қалды», - деп қорытындылады қалалық төтенше жағдайлар департаменті.