Түркістанда жекеменшік мектептердің мұғалімдері жарты жыл бойы айлық алмады

Сарыағаштағы жекеменшік мектепте жұмыс істейтін қызметкерлер 6 ай бойы жалақысын ала алмай келеді, деп хабарлайды Orda.kz.

Сарыағаштағы High school жекеменшік мектебі 5 жылдан бері жұмыс істеп келе жатыр. Бірақ соңғы жарты жылда ол жердегі жұмыскерлердің бәрі тегін қызмет етіп келеді. Күзетші Оразәлі Әділбаев күнде «ақша жоқ» дегенді еститінін айтады.

«6 ай бойы жалақымызды ала алмай келеміз. Күнде «ертең береміз» деп жылы жауып қоя салады. Егер жұмыстан шығып кетсек, мүлде ештеңе ала алмай қаламыз. Сондықтан төзіп келеміз», – деді күзетші.

Жұмыскерлер қарызға батып өмір сүріп, несие алған. Кейбіреулері күнделікті қажет заттарын да ала алмай жүр. Жазда мектеп күрделі жөндеуден өтті: есік, терезелері ауысты, қабырғалары боялды. Жұмысшылар барлығын сапалы атқарғанымен, төрт ай бойы олардың да жалақысы төленбеді.

«Тамыз айында жұмыстарды аяқтадық. Қыркүйек айында айлығымызды сұрасақ, «жоғары жақтан ақша түспеген, ата-аналардың төлеген ақшасына береміз» деп, әртүрлі сылтау айтылды», – деді құрылысшы Ерғали Ережепов.

High School құрылтайшысы мұның бәрін мемлекеттің жекеменшік мектептерді қаржыландыруды уақытша тоқтатқандықтан болып жатқанын айтты.

«Қыркүйек-қазан айларынан бастап жалақы төлемейміз, себебі қаржы жоқ. Мәселе екі ай бойы министрлікте қаралып жатыр. 10 күн ішінде бәрін төлейміз», – деді Айгүл Керейбаева.

Айта кетейік, Талғарда 11-сынып оқушысы 14 жастағы жасөспірімге әлімжеттік көрсетемін деп өлтіріп алды.