Тоқаев Трамп пен Путиннің тарихи кездесуіне баға берді

Қазақстан Президенті Қасым-Жомарт Тоқаев 2025 жылғы 16 тамызға қараған түні Аляскада өткен Ресей мен АҚШ басшыларының кездесуі туралы ойын айтты, деп хабарлайды Orda.kz.

Мемлекет басшысы Қазақстан Дональд Трамп пен Владимир Путиннің Анкориджтегі кездесуін құптайтынын және оны Украинаға қатысты ең жоғары деңгейдегі келіссөздер үдерісінің басталуы ретінде бағалайтынын атап өтті.

«Қасым-Жомарт Тоқаев бұл тарихи саммит екі ел көшбасшыларының саяси ерік-жігерінің, Украинадағы әскери іс-қимылдарды тоқтатуды қоса алғанда, қазіргі заманның түйінді проблемаларын шешуде ортақ тәсілдерді табуға деген шынайы ниетінің арқасында мүмкін болды деп санайды», деп хабарлады мемлекет басшысының баспасөз хатшысы Руслан Желдібай. 

Бұған дейін Ресей мен АҚШ көшбасшылары журналистерге 2025 жылғы 16 тамызға қараған түні Аляскада өткен кездесуінің қорытындыларын мәлімдеді.

Дональд Трамп Ресей Федерациясының басшысын қызыл кілемде қарсы алды. Президенттер жылы қол алысты.