Тоқаев Си Цзиньпинді көктем мерекесімен құттықтады

Қазақстан Президенті Қасым-Жомарт Тоқаев Қазақстан халқының және жеке өз атынан Си Цзиньпинді және Қытай халқын Чуньцзе мерекесімен құттықтады, деп хабарлайды Orda.kz.

«Қытай Халық Республикасының құрылғанына 75 жыл толуымен тұспа-тұс келген Айдаһар жылы мемлекеттің одан әрі гүлденуі жолындағы жаңа жетістіктермен ерекшеленетініне сенімдімін. Сіздің стратегиялық маңызды бастамаларыңыз бен алдағы жоспарларыңыздың табысты болуын шын жүректен тілеймін. Екі ел ынтымақтастығының келесі «алтын 30 жылдығы» аясында біз ең биік мақсаттарға жететінімізге сенімдімін. Мен халықтарымыздың жарқын болашағы жолындағы сындарлы әріптестігімізді жаңа деңгейге көтеруге ерекше мән беремін» деп жазды Тоқаев жеделхатында. 

Қасым-Жомарт Тоқаев Си Цзиньпинге жауапты қызметінде табыс, ал достас Қытай халқына амандық пен жетістік тіледі.

Чунцзе мерекесі бейресми түрде Қытай жаңа жылы ретінде белгілі. Сөзбе-сөз аударғанда көктем мерекесі дегенді білдіреді. Бұл Қытайдағы және Шығыс Азияның басқа елдеріндегі басты және ең ұзақ мереке. 2024 жылы ол 10 ақпанға сәйкес келеді.