Тоқаев «Байқоңыр» ғарыш айлағын 70 жылдығымен құттықтады

Президент Қасым-Жомарт Тоқаев «Байқоңыр» ғарыш айлағының 70 жылдығына арналған бейнеүндеуін жариялады, деп хабарлайды Orda.kz.

Мемлекет басшысы ғарыш саласы қызметкерлері мен ардагерлерін мерейтоймен құттықтап, айлақтың тарихи маңызын атап өтті.

«1957 жылы дәл осы арадан жасанды Жер серігі ұшырылып, ғарышты игеру дәуірі басталды. Көп ұзамай, 1961 жылы айлақтан тұңғыш ғарышкер Юрий Гагарин көк жүзіне аттанды. Бұл тарихи оқиға жаһан жұртшылығын біріктіріп, адамзаттың ғылым мен өркениет прогресіне деген сенімін нығайтты», – деді президент.

Тоқаев Байқоңырдың Қазақстан жерінде орналасқанын зор мақтаныш деп атап өтті. Сондай-ақ қазақтың тұңғыш ғарышкерлері Тоқтар Әубәкіров, Талғат Мұсабаев пен Айдын Айымбетовтің осы Байқоңырдан ғарышқа сапар шеккенін еске алды.

Сөз соңында президент Байқоңыр қаласының тұрғындарына айрықша алғыс білдірді.

«Ғарыш саласы бүкіл адамзатты ортақ мақсатқа жұмылдырып, ғылыми-техникалық прогреске жол ашады. Байқоңыр алдағы уақытта да ұлы жаңалықтардың ошағы боларына сенемін», – деді Президент. 

Еске сала кетейік, Ресей Байқоңыр ғарыш айлағынан бас тартуы мүмкін деген ақпарат мамыр айының басында тараған еді.