«Терезеден секірген»: Түркиядағы жер сілкінісінен 150-ден астам адам зардап шекті

Түркияда Стамбұлдағы жер сілкінісі кезінде кем дегенде 151 адам зардап шеккені белгілі болды, деп хабарлайды Orda.kz. 

Айта кетейік, кеше, 23 сәуір күні Түркияның Стамбұл қаласында 6,2 баллдық жер сілкінісі болған еді. Жер сілкінісі кезінде кейбір адамдар дүрбелеңге салынып, терезеден секіріп кетіпті. Дүмпулер 13 секундқа созылды. Түркияның ішкі істер министрі Әли Ерликаяның айтуынша, жер сілкінісінен кейін үш сағат ішінде ғалымдар 51 жер сілкінісін тіркеді. 

Зардап шеккендердің өміріне қауіп төніп тұрған жоқ. Жер сілкінісінен Фатих ауданында қараусыз қалған ғимарат құлаған. 

Кейбір тұрғындар үйлеріне оралудан қорқып, көшеде түнеді. Біреулер шатырда, кейбірі көлік ішінде ұйықтаған. Қала әкімшілігі мешіттер түні бойы ашық екенін мәлімдеді.

Айта кетейік, наурыз айында Жамбыл облысында жер сілкініп, бірнеше ғимараттар бүлінді.