Темірлан Еңсебекке тағы бір айып тағыла ма? Qaznews24 әкімшісін прокуратура қайта шақырды

Qaznews24 сатиралық жобасының негізін қалаушы Темірлан Еңсебек қайтадан прокуратураға шақырылды. Бұл жолы бұрынғы ісіне қоса тағы бір жаңа бап бойынша жауап алынып жатыр, деп хабарлайды Orda.kz.

Бұл ақпаратты оның жары Мария Кочнева жеткізді. Оның айтуынша, тергеу Qaznews24 парақшасына байланысты тағы бір қылмыстық іс қозғады.

«2025 жылдың қаңтарынан бері Темірланның бұл аккаунтқа ешқандай қатысы жоқ. Қылмыстық қудалау уақытында ол парақшаны жүргізген де емес. Қазір оған 274-бап «көрінеу жалған ақпарат тарату» бойынша айып тағылып жатыр. Егер іс сотқа өтсе, үш жылға дейін бас бостандығынан айырылуы мүмкін», — дейді Мария.

Еске сала кетсек, былтыр тамызда Qaznews24 жобаның жұмысын тоқтататынын жариялаған. Бұдан бұрын Темірлан Еңсебек Қылмыстық кодекстің 174-бабы («ұлтаралық араздық қоздыру») бойынша бес жыл бостандығын шектеу жазасына кесілген еді.