Тәуелсіздік күні көлікке ту ілгендерді полиция тоқтатты

Тәуелсіздік күні қоғамдық көлікке және өз көлігіне мемлекеттік туды іліп жүрген азаматтарды полиция тоқтатты, деп хабарлайды Orda.kz.

16 желтоқсан — Тәуелсіздік күні қоғамдық көлікке мемлекеттік ту ілінгені үшін жүргізушіні полиция тоқтатып, туды алып тастауды талап етті. Оқиға қоғамда қызу талқыланып жатыр.

«Алматы, Алатау базарында туды неге тігесіңдер деп анау милициялар келіп шу шығарып жатыр. Міне, қаншама автобусты жібермей тұр. Көктуды желбіретесің деп бүкіл халықты ұстап тұр», — деді бейнежазбадағы әйел. 

Қазақстан Республикасының «Мемлекеттік рәміздер туралы» заңында мемлекеттік туды қоғамдық көлікке ілуге немесе орнатуға тыйым салатын норма қарастырылмаған. Заңда мемлекеттік рәміздерге құрметпен қарау — әр азаматтың міндеті екені көрсетілген.

Тура осындай жағдай жеңіл автокөлігі бар азаматтың да басынан өткен. Бірақ ол жерде полиция жолда ту желбіреп, жол қозғалысына кедергі келтіретінін атап өтті.

«Мына туды неге мен өз елімде неге мақтан қылып, көлігіме іліп алып жүре алмаймын?», — деді көлік жүргізушісі.

Полиция алып жүре алатынын айтып, қауіпсіздік шараларын сақтау қажет екенін ескертті.

«Жаңа тоқтатты. Неге жүруге болмайды деп сұрасам: «жүруге болады, дұрыс!» деді. «Бірақ жоғары жақтан маған жүргізбе деп жатыр» деді. Арнайы жауап алайын деп түсіріп тұрмын», — деді көлік жүргізушісі. 

Полиция айнаны жауып қалатынын, өзгелерге кедергі келтіретінін қайта-қайта айтты.