Таиландтағы жер сілкінісі: қазақстандықтар қауіптеніп отыр

Таиландта жер сілкінісіне тап болған қазақстандықтар жағдаймен бөлісті, деп хабарлайды Orda.kz.

Еске сала кетейік, Мьянма мен Таиландтағы күшті жер сілкінісінен елде бірқатар қиратулар болды. Бұған дейін Бангкокта 43 адамның үйінді астында қалғаны хабарланған.

Orda.kz редакциясы қазіргі уақытта Таиландта жүрген Қазақстан азаматтарымен байланысқа шықты. Пхукетке наурыз айында келген қазақстандық тұрғын аралдағы жағдайдың тұрақты екенін айтты.

Тағы бір қазақстандық азаматша Мандалай мен Бангкоктағы жойқын жер сілкіністерінен кейін өзін қауіпсіз сезінбейтінін жеткізді.

«Сілкініс орталығы Мьянмада, бірақ Бангкокта екі рет қатты сілкінді. Әуежайлар уақытша жабылды. Пхукетте де солай. Адамдар цунами мен афтершоктан қорқып отыр. Біз де қазір аралдамыз. Интернет пен жарық сөніп қалуы мүмкін, сондықтан барлық гаджеттерді қуаттап қойдық», — деді ол.

Ал бірінші сұхбаттасушы цунамидің бұл аймақта сирек кездесетінін атап өтті. Оның айтуынша, Таиланд үкіметі бақылау және ескерту жүйелеріне қомақты қаржы жұмсап, жағдайды бақылауда ұстап отыр.