Суицид пе, әлде…?: Министр Нұрғанат Ғайыпбаевтың өлімі бойынша жауап беруден тартынды

Ішкі істер министрі Ержан Сәденов Шерзат Полаттың отбасы өртенген үйі мен Нұрғанат Ғайыпбаевтың өліміне қатысты істер бойынша тергеу амалдары әлі жалғасып жатқанын хабарлады, деп жазады Orda.kz.

Министр Ержан Сәденов Нұрғанат Ғайыпбаевтың өліміне байланысты іс те аяқталмағанын айтты.

«Өрт ісі арнайы прокурордың өндірісінде. Тергеу амалдары жүріп жатыр, сондықтан нақты мәлімет бере алмаймын. Бірақ бәрі бақылауда», — деді министр.

Еске сала кетейік, былтыр Талғар қаласында 16 жастағы Шерзат Полатты бір топ жасөспірім ұрып өлтірген. Қанды оқиғадан кейін бірнеше күн өтпей жатып, Шерзаттың отбасының үйі өртке оранды.

Арада біраз уақыт өткен соң, Шерзаттың әкесі Қаржаубай Нұрымовтың інісі Нұрғанат Ғайыпбаев жұмбақ жағдайда көз жұмды. Полиция оны «өз-өзіне қол жұмсады» деп хабарлағанымен, туыстары бұл нұсқаға күмән келтіріп отыр.

5 маусым күні Талдықорғанда Шерзаттың өліміне қатысты сот процесі аяқталып, үкім шықты. Негізгі айыпталушы Абзал Шынасыл 23 жылға бас бостандығынан айырылды. Өзге сотталушылар 1,5 жылдан 20 жылға дейін түрлі мерзімге сотталды.