Соғыс заңы: Иран Израиль тыңшысы деп танылған бес адамды дарға асты

Иран билігі соңғы екі апта ішінде Израильдің барлау қызметімен байланысы бар деген күдікпен 700-ден астам адамды ұстады. Олардың бесеуіне өлім жазасы кесіліп, үшеуі 25 маусым күні елдің көзінше дарға асылды, деп хабарлайды Orda.kz.

Тегеранның ресми мәлімдемесіне қарасақ, бұл азаматтар Израиль әскеріне соққы жасау үшін нысаналардың нақты координаттарын жеткізіп отырған және дрондар мен жарылғыш заттардың бөлшектерін елге жасырын алып кірген.

BBC ақпараты бойынша, айыпталғандардың қатарында Иран мен Ауғанстан азаматтары бар. Мемлекеттік БАҚ оларды «сионистік режимнің агенттері» деп сипаттады.

13 маусымда Израиль Иранға шабуыл жасады. Осыдан кейін, Fars News агенттігінің мәліметінше, елде тыңшылық әрекет күрт көбейіп кеткен.

Сол уақыттан бері 700-ден астам адам ұсталып, бес адам өлім жазасына кесілді. Алғашқы екеуі 22 және 23 маусымда, ал тағы үшеуі 25 маусымда дарға асылған. Үшеуі Урмия қаласында, Түркиямен шекара маңында, ашық түрде жазаланған.

Иран билігі бұл тыңшылардың кейбірі Израильмен байланысы бар әскери операцияларға қатысып, ел ішіндегі стратегиялық нысандарға жасалған шабуылдарға мұрындық болды деп отыр. Олардың кейбірі жоғары шенді ирандықтарды өлтіру мақсатында пайдаланылған техниканы елге жеткізген.

Сот отырыстары «соғыс жағдайына сай» жедел түрде өткен. Елде уақытша бақылау бекеттері қойылып, арнайы қызмет пен ерікті топтар (мысалы, «Басидж») тұрғындардың көліктерін, жүктерін тексеріп жатыр. Тергеу дәлелсіз жүрді деп құқық қорғау ұйымдары алаңдаушылық білдірді. Иранның сот жүйесі жетекшісі Голям-Хосейн Мохсени-Эджеи судьяларға істерді шұғыл қарау жөнінде нұсқау берген:

«Бұл — соғыс уақыты. Біз бір ғана іске екі-үш ай уақыт жоғалта алмаймыз», — деді ол. 

Сарапшылар қазіргі оқиғаларды Ирандағы 1979 жылғы Ислам революциясынан кейінгі жаппай жазалау науқанымен салыстырып отыр. Ол кезде де билік өзіне қауіп төндіреді деп санағандарды тез әрі ашық сотсыз жазалаған болатын.