СҚО-да мүгедектігі бар адамдардан заңсыз салық ұсталған

Солтүстік Қазақстан облысында жұмыс берушілер мүгедектігі бар жұмыскерлерден табыс салығын ұстауға заң тыйым салғанына қарамастан олардан салық ұстап отырған, деп хабарлайды Orda.kz.

Бұл туралы облыс прокуратурасы мәлім етті.

«2023–2024 жылдары Ақжар, Есіл, Мәмлүт, Тайынша аудандарында, сондай-ақ Ғ.Мүсірепов және Шал ақын аудандарында жұмыс берушілер 366 мүгедектігі бар қызметкерлерден  жалпы 16,9 млн теңге болатын жеке табыс салығын заңсыз ұстап келген» деп жазылған хабарламада. 

Бұған қоса, Есіл ауданында білім беру бөлімінің лауазымды тұлғалары мүгедектігі бар балалардың 24 заңды өкілінен негізсіз түрде 1,7 млн теңге көлемінде табыс салығын ұстаған.

Прокурорлық қадағалау актілері нәтижесінде азаматтарға 6,2 млн теңге қайтарылды.

«Заң бұзған тұлғаларды жауапкершілікке тарту шаралары жүргізіліп жатыр»,  деп нақтылады прокуратура. 

Қалған қаражатты қайтару жұмыстары жалғасуда.