Сириядағы Асад режимі жақын арада құлай ма?

Сирияда соңғы 24 сағатта оқиғалар қарқынды дамып жатыр. 24 сағаттың ішінде көтерілісшілер Сирияның оңтүстік-батысын түгел дерлік басып алып, ел астанасы Дамаскіге жақындады. Президент Башар Асадтың қайда екені белгісіз, деп хабарлайды Orda.kz BBC Орыс қызметіне сілтеме жасап.

Көтерілісшілер 2011 жылы президент Башар Асад режиміне қарсы көтеріліс басталған Сирияның оңтүстігіндегі Дараа аймағының көп бөлігін басып алып, көптеген әскери нысандарды бақылауға алғанын айтады.

Соңғы ақпарат құралдарының хабарлауынша, Сириядағы Хомс қаласын Асад әскерлері тастап кеткен және қазір бүлікшілердің бақылауында. Әскери түрмеден Башар Асад режиміне қарсы болған 3500-ге жуық тұтқын босатылды. Сирия армиясы көтерілісшілердің қалаға кіріп үлгергенін жоққа шығарды.

Көтерілісшілердің келесі нысанасы Дамаск болуы мүмкін. Басты сұрақ Сирия президенті Башар Асадтың қазір қайда екендігі. Сирия ақпарат агенттігі оның Дамаскіде қалғанын хабарлады. Бірақ оның дәл қайда екені белгісіз. Қала маңындағы бірнеше елді мекенде Асад әулетінің билік нышандары жойылып жатыр: портреттер жұлынып, Дамаск маңындағы Сирия президенті Башар Асадтың марқұм әкесінің ескерткіші қиратылды.

Қараша айының соңынан бері Хаят Тахрир аш-Шам бастаған үкіметке қарсы топтар Сирияда шабуылдауда. Сирия армиясы бұған дейін елдің батысындағы ірі Алеппо мен Хама қалаларын және шығыстағы Дейр-эз-Зорды бақылаудан айырылған болатын. Бір күн бұрын сириялық көтерілісшілердің Сувейда қаласына кіргені белгілі болды. 

Сондай-ақ шығыста үкімет күштері Дамаск бағытында ол жерден эвакуацияланғаннан кейін Хасака қаласын бақылауға алғаны хабарланды. 7 желтоқсанда содырлардың ежелгі Пальмира қаласын басып алғаны белгілі болды.

Болжам бойынша, Хомстағы түрмеден тұтқындарды босату сәті түсірілген кадрлар: